Close
thumb Ka Roimata
Te Rangitaki Ataata a Ngātai mō ana Hararei Video

Te Rangitaki Ataata a Ngātai mō ana Hararei

Kā Roimata o Hinehukatere

Video Transcript
Tēnā tātou.
Ka haere au ki te hararei māku, ka ako au i ngā kōrero mō tētahi o aku tīpuna …
Haere mai, ka haere tāua ki Poutini ki te Toka.

Koia ko Kā Roimata o Hinehukatere tēnei. He awa kōpaka tēnei, he rerenga tio ka āta heke haere i te tahataha o te maunga.

Muia ana te awa kōpaka nei e te tini tangata o ngā hau e whā.

He wāhi tongarerewa hoki ki tōku iwi. He kōrero tā mātou mō te pūtakenga mai o te ingoa nei, o Kā Roimata o Hinehukatere.

I ngā rā onamata, tērā tētahi wahine o konei, ko Hinehukatere te ingoa. He tohunga ia ki te kake maunga.

I te raumati, ka piki ia ki ngā taumata teitei o ngā maunga, ki reira tākaro ai i te hukarere.
Engari i te takurua, he mōrearea rawa te noho ki ngā maunga. Ka heke kē a Hinehukatere ki ngā whenua hakahaka, ki reira noho ai.

I te takurua o tētahi tau, ka tūtaki ia ki tētahi tangata ko Wawe te ingoa. Ka tupu te aroha, tētahi ki tētahi.

Ka tae anō ki te raumati, ka kawe a Hinehukatere i a Wawe ki ngā maunga.

Engari he waewae tauhou a Wawe ki te hāereere i te hukarere me te hukapapa.

Ka paheke a ia, ka taka ki tōna matenga.

Pūkatokato ana te ngākau o Hinehukatere i te aroha ki tana hoa.
Wairurutu ana ia ki te tangi.

Me te aha, ka aroha ngā atua ki a ia.
Ka whakatiohia e rātou ōna roimata e heke haere ana i ngā tahataha o te maunga.

Ā, e heke haere tonu nei Ka Roimata o Hinehukatere i ngā pāpāringa o te maunga.

He tohu whakamahara ki a Hinehukatere, ā, ki tōna aroha nui ki a Wawe me ngā maunga.

He kōrero tēnei nā Kāi Tahu, nō Poutini ki te Toka.
Related Resources