Close
thumb Noti Hinetamatea
Te Rangitaki Ataata a Ngātai mō ana Hararei Video

Te Rangitaki Ataata a Ngātai mō ana Hararei

Noti Hinetamatea

Video Transcript
Tēnā tātou.
Ka haere au ki te hararei māku, ka ako au i ngā kōrero o aku tīpuna ...
Tēnā haere mai, ka haere tāua ki Poutini ki te Toka.

Nō taku taenga mai ki taku marae i Maitahi, ka rongo au i ngā kōrero mō te kaha, mō te mōhio o aku tīpuna ki te pōkai whenua, ki te kake maunga.
Ka takahia e rātou ngā ara huri katoa i Te Waipounamu, tae atu ki ngā maunga hukarere.

I te taenga mai o te Pākehā, nā aku tīpuna rātou i ārahi haere i ngā ara whakawhiti paemaunga.
Nā aku tīpuna anō rātou i āwhina ki te hanga i ētahi o ngā ara e whakamahia tonutia ana e te hunga takahi whenua, i ēnei rā.

Kei Karangarua au, i Poutini ki te Toka. Koia nei te tīmatanga o Te Nōti Hinetamatea – ko Hinetamatea tō mātou tipuna i kite tuatahi i te ara whakawhiti maunga i te taha uru ki te taha rāwhiti.

I ngā rā o tuauri, ka haere mai a Hinetamatea rātou ko tana whānau ki konei puni ai i te raumati, he mahi kai te kaupapa.

I tētahi rangi, ka kite rātou i ētahi tūī e rere ana i te riu nei, e ahu ana te rere ki ngā maunga.
Whakatau ana rātou me whai haere rātou i ngā manu nei.

Ka whāia te awa, ka whāia hoki ngā takahanga waewae a ngā kākāpō i te ngahere – he uaua pea te whakapono ki tēnei, engari he pono tonu!

Ko Pōpātea tēnei.
Kāore e kore he oranga ngākau, he oranga tinana te taenga mai o Hinetamatea me tana whānau ki konei!

Ka rawe te wera o ngā hōpua nei!
E whakapae ana au i noho roa mai rātou ki Pōpātea.

Kātahi a Hinetamatea mā ka piki ki runga atu o ngā maunga.
Ko Kahukura tērā e ārahi ana i a rātou.
Ko Taipo tērā e ārai ana.

Ka kitea e rātou te ara i pai ai te whakawhiti ki ngā whenua kei tua o ngā maunga.
Heoi anō, i mate a Hinetamatea i te ara, ā, ka tanumia ia ki te kōpū o Aoraki.

Kāore i ārikarika te kai i te taha rāwhiti o ngā maunga.

Ka maha ngā tau e noho ana rātou ki te taha rāwhiti o ngā maunga, me te whakawhitiwhiti i waenga i Aoraki me Poutini ki te Toka.

I ēnei rā, ka whakawhāiti mai te tini tāngata mai i ngā tōpito katoa o Aotearoa me te ao ki te whai i ngā tapuae o Hinetamatea ...

E whai ana hoki i ngā ara kua tata te kotahi mano tau e takahia ana e ō mātou tīpuna.

He kōrero tēnei nā Kāi Tahu, nō Poutini ki te Toka.
Related Resources